Ciidamo hordhac u ah Maxaakiimta Islaamiga ah oo soo gaaray Magaalada Jillib ee Gobolka Jubbada Dhexe

Sabti, September 23, 2006(HOL): Sida ay xaqiijiyeen illo xog ogaal ah waxaa soo gaaray magaalada Jillib ee gobolka Jubbada Dhexe gaadiidka dagaalka oo ay la socdaan cutubyo ka tirsan ciidamada Maxaakiimta Islaamiga ah oo doonaya in ay weeraraan magaalada Kismaayo.

Magaalada Jillib oo ah magaalo ujirta magaalada Dekedda leh ee Kismaayo 120 Km ayaa waxay sheegayaan dadka ku dhaqan in ay arkeen guutooyin ka tirsan ciidamada Maxaakiimta oo soo gaaray halkaasi, haseyeeshee ma jiraan warar taasi si rasmi ah u xaqiiijiyey.

Dhinaca Isbahaysiga Dooxada Jubba ee ka taliya Kismaayo ayaanan jirin wax warar ah oo ka soo baxaayo tan iyo intii ay soo baxday shaqaadadaan ka dhanka ah maamulkooda , haseyeeshee qaar ka mid ah shacabka ayaa arinka duulaanka maxaakiimta ka hadlay kuwaasoo sheegay in aysan ahayn wax haboon in xiligaani weerar lagu soo qaado Jubbooyinka .

Waxaa kacsan dareenka bulshada oo inta badan markaad booqato goobaha lagu qaxweeyo ee maqaayadaha oo ay dadku isla dhexmrayaan xaaladda dagaalka Kismaayo.

Dhinaca xadka Kenya ee Soomaaliya ciidamada Maxaakiimta ayaa lagu soo waramayaa in ay xireen si aysan uga soo gudbin wax ciidamado ah deeganaadsi .colaadani waxay ku soo beegantay xili Isbahaysiga Dooxada Jubba madaxdooda qaarkood uu qilaaf ka dhexeeyo.