Warar dheeraad ah oo ku saabsan dagaal ka dhacay gobolka Mudug
Arbaco, Feberaayo, 15, 2017 (HOL) - Warar dheeraad ah ayaa ka soo baxaya dagaal
shalay gelinkii dambe ka dhacay inta u dhaxeysa deegaanka Ceel Cabdi oo ka
tirsan Gobolka Mudug, iyadoo dagaalkan uu u dhaxeeyay ciidamo ka tirsan
Kumaandooska Soomaaliya, kuwa Galmudug oo dhinac ah iyo dagaalamayaasha
Al-Shabaab.
Sida ay sheegayaan wararka dagaalka ayaa yimid, kadib markii dagaalyahano ka
tirsan Al-Shabaab ay jidka u galeen ciidamada huwanta oo ku sii jeeday degmada
Xarardheere oo ay gacanta ku hayaan Al-Shabaab.
Sarkaal ka tirsan maamulka Galmudug ayaa sheegay in dagaalkii shalay uu hal
askari kaga dhintay, halka saddex kalena ka dhaawacmeen, haatana xaalada
deegaanka ay degan tahay.
Ciidamada huwanta ayaa qorsheynaya inay la wareegaan degmada Xarardheere oo
ah meel istiraatiiji ah oo leh xeeb.
Al-Shabaab ayaa la sheegay inay wadaan dhaq dhaqaaqyo ciidan ay kaga hor-tagayaan
duulaanka ku soo wajahan, waxaana barakac ka socda deegaano ka tirsan degmada
Xarardheere.
Ugu danbeyntii, ciidamada huwanta ayaa maalin ka hor la wareegay deegaanka
Camaara iyo deegaanka Bacaad-weyn, waxaana ay tan iyo shalay wadeen dhaq
dhaqaaqyo ciidan oo ay ugu ruuqaansanayaan degmada Xarardheere.
C/raxmaan Diini, Hiiraan Onlin
[email protected]