Guddoomiyaha rugta ganacsiga maamulka Hirshabeelle oo Jowhar lagu doortay
Arbaco, Feberaayo, 15, 2017 (HOL) – Kulan magaalada Jowhar ay ku yeesheen xubno ka tirsan
ganacsatada labada gobol Hiiraan iyo Shabeellaha dhexe ayaa looga dhawaaqay
guddoomiyaha rugta ganacsiga maamul gobolleedka Hirshabeelle.
Guddoomiyaha rugta ganacsiga Hirshabeelle ayaa loo doortay Shiikh Xuseen
Axmed Cali halka guddoomiye ku xigeenka Hirshabelle loo doortay Xaliimo Sacdiyo
Sheekh Cabdullaahi iyo Yuusuf Maxamuud Weheliye.
Guddoomiyaha rungta
ganacsiga Sheekh Xusseen Axmed Cali ayaa
sheegay in dhismaha rungtan ganacsi muhiimad gaar u leedahay isku xirnaanta iyo
iska warqabka ganacsatada labada gobol, isaga oo intaa ku daray in laga
maarmaan aheyd dhismaha rungta madaama guud ahaan marka la eego maamulada kale
ee dalka leeyihiin ururo ay ku mideysan yihiin.
‘’Ujeedadeena waa in aan u midoowno sidii ay aan iskugu xiri
laheyn ganacsatada labada gobol, xiriir toos ahna ula yeellan laheyn
ganacsatada kale ee dowlad gobolleedyada dalka’’ ayuu yiri guddoomiyaha.
Munaasabad lagu caleema saarayay guddoomiyaha rugta ganacsiga Hirshabeelle
ayaa waxaa ka soo qeybgalay oday dhaqameedyo,waxgarad iyo qeybaha kala duwan ee
bulshada.
Ugu danbeyntii, waa markii ugu horeysay ee uu rug ganacsi oo ka dhaxeeya
guud ahaan dowlad goboleedka Hirshabeelle la dhiso waxayna dhisida rugta
ganacsiga qeyb ka qaadan kartaa sidii loo horumarin lahaa ganacsiga maamul
goboleedka Hirshabelle.
C/raxmaan Diini, Hiiraan Onlin
[email protected]