Ku dhawaan 100 tahriibayaal ah oo meydadkooda laga helay xeebta Liibiya
Talaado, Feberaayo, 21, 2017 (HOL) – Meydadka
ilaa 87 tahriibayaal ayaa laga hellay xeebaha dalka Liibya, gaar ahaan gobolka
Zawiya.
Dadkan oo sida la sheegay u badnaa dhalinyaro ayaa laga yabaa in ay isku
dayayeen in ay ka tallaabaan badda Mediterranean-ka, si ay u gaaraan
Taliyaaniga.
Bilihii la soo dhaafay, tirada tahriibayaasha ku dhimatay badda Liibiya ayaa
sare u kacday, sida hay'adaha ay sheegayaan.
Doon bac ah oo dillaacday ayaa laga helay meel u dhow xeebta maydadka
lagasoo aruuriyay.
Waxaa la rumeysan yahay in doonta noocaas ah lagu qaado 120 qof. Shaqaalaha
gurmadka waxay sheegeen in ay suuragal tahay in maydadka qaar ay biyaha hoos u
galeen.
Qaar ka mid ah dadka dhintay waa caruur, sida la sheegay.
Afhayeen u hadlay hay'adda Bisha Cas ee Liibiya wuxuu sheegay in maydad
badan ay ka soo aruuriyeen xeebta.
Maxamed Al-Misrati wuxuu sheegay in maamulka deegaanka ay maydadka geeyeen
qabuuro ku yaalla magaalada Tripoli.
Hay’adda Bisha Cas ayaa baahisay sawiro muujinaya tobannaan maydad oo baco
lagu xiray oo yaalla xeebta.
Ugu danbeyntii, hay'adda socdaalka u qaabilsan Qaramada Midoobey ee IOM
waxay sheegtay in doonta Axaddii ay ka safartay Liibiya, waxaana saarnaa sida
la xaqiijiyay 110 qof.
C/raxmaan Diini, Hiiraan Online
[email protected]