Liibiya : Jabhad weyn oo bur burtay
Axad, May, 28, 2017 (HOL) - Ururka ka tirsan
maleeshiyaadka Islaamiga ah ee ka dagaalama gudaha waddanka Liibiya - kaas oo
uu Mareykanku ku eedaynayo in uu ka dambeeyay weerrarkii 2012-kii lagu qaaday
howlgalka America ee Benghazi - ayaa sheegay in ay burbureen.
Ururka Ansaar Al-Shariica ayaa la dagaalamayay ciidamada isku tilmaamay in uu
yahay xoogga qaranka Liibiya, oo saldhigyada ku leh bariga dalkaasi kaas oo uu
abaanduule u yahay Khaliifa Xaftar.
Bayaan uu soo saaray ururkaasi ayuu ku sheegay in khasaare weyn uu ka soo
gaaray dagaaladda, isla markaana la laayay hogaankiisa.
Jabhaddaasi ayaa ugu baaqday ururrada Islaamiyiinta ah in ay u midoobaan
dagaalka Benghazi.
Hogaamiyihii Ansar al-Shariica, Maxamed Azahawi, ayaa dabayaaqadii 2014 ku
dhintay dagaal ay xooggagiisa Benghazi kula galeen ciidanka Jenaraal Khaliifa
Xaftar.
Jenaraalka oo ka dagaallama bariga Liibiya, ayaa horraantii bishan qaaday
duulaan uu Benghazi kaga xoraynayo xooggaga mintidiinta ah.
Qaar badan oo ka mid ah dagaalyahannada Ansar al-Shariica ayaa ku biiray
ururka la baxay Dowladda Islaamiga ah ee Liibiya.
Jabhadaasi ayaa markii ay dhacday dowladdii Qadaafi, waxa ay la wareegtay
saldhigyadii ciidan ee ku yaallay Benghazi, waxaana ay ka dhigtay goobo lagu
tababaro kumannaan dagaalyahan oo intooda badan markii dambe aaday Ciraaq iyo
Suuriya.
C/raxmaan Diini, Hiiraan Online
[email protected]
