Madaxweyne Soomaaliya iyo wafdi uu horkacayo oo wajahan magaalada Cadaado
Isniin, May, 29, 2017 (HOL) - Madaxweynaha
Soomaaliya Maxamed C/llaahi Farmaajo saacadaha soo socda ku wajahan magaalada
Cadaado ee xarunta KMG u maamul gobolleedka Galmudug, isaga oo ka qeybgali
doona munaasabada calleemo saarka madaxweynaha dhawaan la doortay Axmed
Ducaalle Geelle Xaaf.
Wafdi horu-dhac u ahaa Madaxweyne Farmaajo oo uu hoggaaminayay Wasiirka
Arrimaha Gudaha ayaa shalay gaaray Cadaado, iyadoo sidoo kalena diyaarad siday
ciidamo gaar ah oo sugi doona ammaanka Madaxweynaha ay shalay gelinkii dambe ka
degtay Cadaado.
Madaxweynaha maamul gobolleedka Puntland Cabdiwli Gaas ayaa sidoo kale
qorshuhu yahay in uu ka mid noqdo wafuud ka qeybgali doonta munaasabada
calleemo saarka madaxweynaha Galmudug.
Ka qeybgalka madaxweyne Gaas ee munaasabada calleemo saarka madaxweynaha
Galmudug ayaa fure u noqon karta xiriir wanaagsan oo dhaxmara labada dhinac,
madaama marar badan o o hore labada maamul ku dagaallameen magaalada Gaalkacyo
oo u kala qeybsan labada dhinac.
Axmed Ducaalle Geelle Xaaf ayaa la doortay horaantii bishan, kaddib markii
uu xilkaa iska casilay madaxweynihii hore Cabdikariin Xusseen Guulleed oo
mucaaradad weyn kala kulmay xildhibaannada baarlamaanka maamulka.
C/raxmaan Diini, Hiiraan Online
[email protected]
