Siilaanyo : Soomaaliland iyo Itoobiya taariikh dheer ayeey wadaagaan
Isniin, May, 29,
2017 (HOL) - Madaxeynaha Somaliland, Axmed
Maxamed Siilaanyo ayaa sheegay in ay taariikh dheer oo guun ah wadagaan
Somaliland iyo Itoobiya,isla markaana wakhti isku mid ah iska rideen laba
kalitalinimo oo wadankoodda haystay.
Madaxweynaha oo hambalyo u diray dowladda iyo shacabkaItoobiya oo u dabaaldegaya sanad
guuraddii 26aad ee ka soo wareegtay markii Itoobiya iska xoraysay rajiimkiii
dhergiga ahaa ee wakhtigaasi xukumi jiray.
“Madaxweynaha
Somaliland, Mudane Axmed Maxamed Silaanyo isaga oo ku hadlaya afka shacbiga
Somaliland iyo ka qaranka Jamhuuriyadda Somaliland, waxa uu dhambaal
hambalyo ah u dirayaa dalka aynu walaalaha iyo jaarkaba nahay ee Itoobiya iyo
shacbi weynaha dalkaas, isaga oo madaxweynuhu ku hambalyeynaya sannad guurada
26-aad ee ka soo wareegtay markii ay shacbiga dalka Itoobiya ka guulaysteen
rajiimkii dhergiga ahaa ee xiligaasi xukumaayey dalka Itoobiya, marka
taariikhda Itoobiya loo noqdana ku beegan xuska 20 guurada loo yaqaan ginbot
2009.”ayaa lagu yidhi war-saxaafadeed ka soo baxay madaxtooyadda oo uu ku
saxeexan yahay agaasimaha saxaafadda Madaxtooyadda Naasir Yuusuf Daahir.
“Xuska
ginbot oo ah maalin taariikhda Itoobiya qiimo weyn ugu fadhida waxa uu
madaxweynuhu u rajaynayaa shacbiga iyo dawladda Itoobiya inay sannadka,
sannadkiisa ku gaadhaan guul, barwaaqo, iyo Itoobiya oo ka sii horumarta halka
ay maanta marayso.”ayuu madaxweynuhu raaciyey.
Madaxweynaha
oo ka hadlaya xidhiidhka ka dhexeeya Somaliland iyo Itoobiya waxa uu yidhi
“Marka laga yimaado xidhiidhka saaxiibtinimo, iskaashiga nabadgelyada,
ganacsiga, iyo deris wanaaga ee Itoobiya inaga dhexeeya waxa hubaal ah oo
aynu wadaagnaa taariikh ma guurto ah oo ah in aynu isku wakhti ama rubuc
qarniba aynu wada xusaynay taariikh mataano ah oo shacbiga labada dal ay kaga
hoos baxeen gacantii keli talisnimada ee militeriga ahayd ee Mingiste
Hailemariam iyo Maxamed Siyaad Barre oo ay hadda ka soo wareegtay 26 sanno
markii xukunka laga tuuray.”
Wadanka
Itoobiya ayaa si weyn loogu dabaaldega maalinta loo yaqaan Ginbot oo ah
maalintii jabhaddii xoreynta Itoobiya la wareegtay gacan ku haynta wadanka,isla
markaana uu xilka wadankaasi la wareegay Meles Sanaawi Ra’isal wasaarihii
Itoobiya ee Geeriyooday.
Barkhad-ladiif M. Cumar, Hiiraan Online
[email protected]
Hargeysa, Somaliland
