Wasiir Juxa ‘’ dalkan waa la wada leeyahay cid kasta oo naga aragti duwan waan la hadleynaa
Arbaco, October, 11, 2017 (HOL) – Wasiirka
wasaaradda arrimaha gudaha iyo dib-u-heshiisiinta xukuumada Soomaaliya Cabdi
Faarax Juxa ayaa sheegay in dowladda federaalka Soomaaliya mudnaanta koowaad siineyso arrimaha dib-u-heshiisiinta.
Wasiir Juxa ayaa sheegay in wax yaabaha leysku hayo yihiin kuwo kala gadisan
laakiin guud ahaan marka la eego u baahan in laga wada hadlo si leyskula meel
dhigo.
‘’Colaad ayaa jirta, siyaasad ayaa leysku hayaan, Kheyraadka ayaa sidoo kale
ka mid ah wax yaabaha muranka ka jiro, dastuurka iyo awood qeybsiga intaba
waxaa ay ka mid yihiin waxyaabaha taagan ee u baahan in laga wada hadlo oo laga
heshiiyo’’ ayuu yiri wasiirka.
Waxaa uu sheegay in dowladda ahmiyad gaar ah siin doonto cid kasta oo aragti
kale qabta, isaga oo sheegay in dowladnimo tahay mid la wada leeyahay sidaa
daraadeed muhiim tahay in la wadda hadlo.
‘’Cid kasta oo naga fikir duwan oo naga maqan ama xabad nagu soo rideysa
diyaar ayaan u nahay in lala hadlo waayo dalkan waa la wadda leeyahay cid gaar
u leh ma jirto, sidaa daraadeed in la wada hadlo oo waxyaabaha markaa taagan
laga heshiiyo waa muhiim’ ayuu hadalkiisa raaciyay wasiirka arrmaha gudaha.
Hadalka wasiirka ayaa imanaya xili uu jiro madmdow siyaasadeed oo soo kala dhaxgalay
dowladda dhexe iyo madaxda qaar ka mid ah maamul gobolleedyada dalka ka jira oo
hadda ku shirsan magaalada Kismaayo iyo Ururka Al-shabaab oo dhinaca kale
dagaal ku la jira dowladda.
C/raxmaan Diini, Hiiraan Online
[email protected]