6/18/2024
Today from Hiiraan Online:  _
Wararka Maanta- Sabti, Feb 4 , 2023
Sirdoonka Maraykanka oo xog cusub kasoo saaray dilkii Bilaal Suudaani
 

Sabti, February, 4, 2023 (HOL) - Dilka sarkaal sare oo ka tirsanaa kooxda Daacish oo ku dhawaad labo todobaad ka hor ay ciidamada Mareykanka ku dileen buuralayda gobolka Bari ee Puntland, ayaa tooshka ku ifiyay shabakad maaliyadeed oo ka jirta Geeska Afrika sida uu sheegay sirdoonka Maraykanka.

Xoghayaha difaaca Lloyd Austin ayaa sheegay in Bilaal Suudaani uu mas’uul ka ahaa shabakad qaabilsanayd kobcinta joogitaanka ISIS ee Afrika iyo maalgelinta howlgallada kooxda ee adduunka oo dhan, oo ay xitaa ku jirto Afghanistan.

Sudani wax uu raadaarka Maraykanka ku jirtay horaantii 2012, markaasoo ay cunaqabatayn ku soo rogtay magaciisa saxda ah Suhayl Salim Abd el-Rahman, doorkii uu ka qaatay fududaynta in dagaalyahanada ajaanibka ah ay gudaha u soo galaan Soomaaliya kana barbar dagaalamaan Al-Shabaab.

Warbixin ka soo baxday Qaramada Midoobay oo la daabacay bishii Luulyo ee sanadkii hore oo lagu baadhay doorka Bilaal Suudaan ee dhaqaalaha kooxda Daacish, ayaa lagu sheegay inuu ahaa xubin weyn oo dhaqaalaha Daacish kasoo qaadi jiray dibbeda sida Afganistan, isagoo kadib soo marsiin jiray Yemen, halkaas oo lagasoo galin jiray Soomaaliya.

Bishii Ogosto 2016, ciidamada gaarka ah ee uu Maraykanku tababaray ee Soomaaliya iyo kuwa dhiggooda ah ee ka socda Puntland, ayaa sameeyay hawlgal ay isku dayeen in ay ku soo qabtaan, balse laguma guulaysan.